榨菜牛鬆燴豆腐 - 2012年11月2日

家常菜只有簡單材料，少許調味
要煮得好，其實步驟和微細之處，
比外貌取悅大眾的大菜，其實更難!
像今次的重點，切粒粒花功夫，但亂切大細不一，榨菜就會太咸太搶；
免治牛肉不夠油，炒會黏起一堆！


榨菜牛鬆燴豆腐　由金門莊私房菜娥姐提供

材料 　　
淡味榨菜 1件拳頭大小
薑粒、蔥粒
免治牛肉　約４両
布包豆腐　２磚

榨菜太多, 最後我只用了半件

做法
１． 榨菜洗淨，切去老硬部份，然後剁成細細粒。用水浸幾分鐘，瀝乾。

最近新買的小箕, 好用!

２． 白鑊烘乾榨菜粒。
３． 牛肉用少少生抽、胡椒粉，生粉。如果攪拌太黏就加點點水。　然後落１湯匙油拌勻。
４． 豆腐切細粒，留意豆腐炒時可能會碎，大細要自行酌情。
５． 豆腐隔水蒸一會，出走水份。放涼待用
６． ２－３湯匙油起鑊，爆香榨菜，撥埋一邊，放入牛肉炒熟，兩樣材料都撈起待用。


狠心下油, 油夠多, 炒起來真的散開一粒粒牛鬆

７． 用餘下的油，爆香薑粒，放入豆腐，加鹽、蠔油、少少糖，調好味。
８． 放回榨菜、牛肉同炒。
９． 用少少生粉水，打琉璃芡，上碟。　最後放上蔥花，可加點麻油，完成！

娥姐貼士
有些南貨店榨菜會有兩種味，揀淡口味，沒有辣粉的，通常叫台灣榨菜。　
免治牛可用入口凍肉，更有牛味同滑ｄ。
琉璃芡旨在收豆腐水份，薄薄即可，不用成汁。