蝦醬豬扒 ~ 易整到暈 2012年11月30日

去大澳玩, 例牌買蝦醬, 炒了幾次菜, 到現在通菜過季了, 成樽放埋一邊! 原來咁樣醃豬扒好滋味!

醃得入味, 基本上都好食, 要留心係買相。
今次上粉麻麻地, 煎豬扒時已經開始甩, 雖然娥姐話唔駛上一層皮, 不過甩晒粉就冇左金黃色, 唔夠靚, 所以粉都係要上多少少, 上均勻d!

蝦醬豬扒 由金門莊私房菜　娥姐　提供

材料 　　
巴西豬扒 4片
雞蛋 1隻　（細隻）
麵粉 １　1/2湯匙　　（或用生粉代替）
蝦醬 1湯匙
２粒乾蔥 碎粒

做法
１．蝦醬加１湯匙酒，1/4茶匙糖，少少生抽，拌勻成汁。
２．豬扒解凍，沖淨抹乾，用刀拍。然後在骨位用劃一刀，否則煎時會捲起
３．豬扒處理好就用步驟１的汁，加雞蛋，醃一會。
４．加麵粉撈落去，撈到豬扒兩面都有粉，咁會薄薄一層，又不見粉皮面。
５．燒熱油，半煎炸，煎完一面熟呈金黃，才煎另一面，撈起
６．倒走多餘的油，爆香乾蔥，放回豬扒，吸收乾蔥香味，最後灑點酒和醬油在鑊邊，鑊邊，取其香味，完成！

娥姐貼士
蝦醬隻隻唔同味，自己因應調較份量，　半至１湯匙
新鮮豬扒難處理，要找相熟豬肉檔才確保肉質。　家庭做用冰鮮就可以。
買豬扒要揀晶瑩剔透，無花紋（筋），有點均勻的脂肪，才會軟滑。