Day 4 15.2.2010　雪地裡的悉高班尼

路線：克拉科夫(Krakow) -----à悉高班尼(Zakopane)-----à克拉科夫(Krakow)

原本今朝早我無需再繼續『工作』，但昨晚經阿珊提醒我好像計少了一日行程，於是我再重新計算過後，真估不到我老猫燒鬚，居然編少了一日的行程！不過對於我來說並不困難，我還應該感謝神，祂給我和阿珊有多一日的遊玩時間！因為之前編排行程的時候，我亦覺得留在波蘭只得五日時間實在太短，我還想去波蘭北部的那座城堡，感謝主，突如其來多出來的一日便可以實現這個願望，於是今朝早我便在酒店大堂附設的電腦上網，訂好那多一日在華沙的酒店，只可惜酒店附設的那部電腦只可以看到英文，看不到中文，不能夠看到朋友在新年期間向我的祝福。

『OK啦！我地按原計劃明天去完集中營，便乘夜火車回華沙，我地今次會增遊波蘭的北部睇古堡，阿團友你會唔會俾多一日貼士我？』

『好…..難啊！咁我地今日去邊呀？』

『我地今日要乘長途巴士再南下一個小鎮譯作悉高班尼(Zakopane)，因為要坐兩個小時，所以我想去到先食早餐，OK?』

『OK!』

『不過我想試下呢度街頭賣既硬麵包，你要唔要？』

『NO啦！你知我最唔鐘意食麵包。』

我們乘坐當地的長途公車，兩個小時過後便到達悉高班尼。

『喂，kk，我好肚餓啊，我要食野啊！』

『對面好像有一間餐廳，我們過對面咯！』

當我們進入了那間餐廳後，我們找了座位便坐下來。

『哎呀！好肚餓啊！快些叫野食呀！』

『係啦，你飲熱湯食住包先啦！』

『我唔鐘意食包，你食啦，仲有咩食呀！』

『我叫了波蘭雲吞，是地道菜，我有個朋友介紹過。』

但當我咬了一口，『吓！咩裡面係薯蓉呀，我唔鐘意食薯蓉，你食啦！』

食過呢餐唔好食既早餐之後，我們便繼續出發。

很多旅遊書都推薦來這裡遊玩，說這裡可媲美瑞士的小村莊，但沿路我卻感覺不到這裡有甚麼好看，不過阿珊卻自我陶醉地玩自拍，直到我們到了一個市集，這裡有很多售賣紀念品的店舖，這些紀念品當中更有各種皮具用品及飾物，我們一直向前行，直至到了山頂纜車站。

『珊，不如我地搭纜車上山咯？』

『好啊。』

當纜車上到山頂後，氣溫更底，但我們都不大理會，繼續沿路行。

『我記得上次我問過我一位朋友，如果我得幾個月命，你會唔會娶我？如果係你你會點答？』

『唔…….如果你真係得幾個月命，我會搵律師同你立遺囑，計算好你所有身家，遺囑上寫受益人係我，咁我會考慮同你結婚。』

『車！你都無誠意既！』

『無辦法啦！職業病，你死左，我都要負責幫你辦身後事喎。』

我們繼續行了一陣。大家亦談了其他事。

『呢度好似無咩好睇喎，不如走咯？』

『好啊。』 

我們下了山，到了一間餐廳午膳，之後在熱鬧的市集再行了一陣便搭回公車回克拉科夫。

『你打了電話給家人未？』

『我家人去了旅行未返來，遲兩日再打回去吧。你呢？』

『我家人都去了旅行，不過我自己都不大習慣打電話返屋企，因為如果有事，他們也幫不了忙。』

『以前我都好似你咁諗，不過自從舊年我同一班朋友去哈爾濱旅行，其中有兩個團員係出發前去了雲南走一敞，佢地包了車四圍去，但個司機開車開得好快，佢地又無扣安全帶，結果發生了意外，一死一傷，我地聽到呢個消息都好唔安樂。』

『唉！意外既野大家都唔想，總之樣樣事都要小心囉。生死有命，有很多事都有上天安排，我們怎樣控制也控制不來。』

當然我們很順利地回到克拉科夫。

『明天我們要去集中營，聽講個度無野食，所以我地要去超級市場買些乾糧。』

『哦，好啊。』

原本我諗今集路人甲唔會出現，不過佢卻係呢個時候出場，當我和阿珊買好乾糧，正排隊付款的時候，排我們後面有個男人好像飲醉酒般不斷向阿珊搭訕。

『Where are you from?』

阿珊當然唔想理佢，為了阿珊唔好被騷擾，於是我叫她係門口等我。

『所以你最好唔好夜晚周圍去，呢度好多醉酒佬架。』

『知道，團長。』