日期 :   5/4/2010

天氣 : 天陰 & 微雨 & 天睛 

我哋今日就係九點鐘發，第一個景點就係本來尋日想去埋嘅集集火車站喇，呢一個係一個日治時代日本軍起來運輸木材嘅一條火車線，家下就變咗做遊客嘅觀光點，遊客重可以搭一下呢一條鐵路添(不過我哋無搭!!)。係去呢個集集火車站嘅路途中見到有個牌寫住集集綠色隧道，當然要去睇下啦，呢一綠色隧道其實係一Ｄ樟樹圍住嘅馬路，都幾長下，我哋就係到周圍影下相。上車繼續行程行行下又見到有兩架坦克車放咗係到，我哋當然又係要落車去影下相喇，三哥同二哥都行咗入去架坦克車入面影相，影完相之後上車繼續行程嘅時候，三哥發覺雙腳已經俾Ｄ餓咗好耐嘅蚊咬咗好多嘢啦....成腳都係蚊癩，真係聞者傷心見者留淚啦 !! 二嫂佢哋又帶咗Ｄ祖國出產嘅湯火膏，俾三哥搽下，應該有效呱 !! 去到集集火車站有間木廠嘅女職員見到三哥對瘋爛腳就俾咗Ｄ專門搽蚊咬俾三哥搽，過咗一陣果然係有效呢....

集集綠色隧道

呢一到就係集集線啦

有個團友想瞓一瞓火車軌

惡蚊溫床坦克車

去廁所都有五式

受害者

跟住我哋就係個火車站到影下相，影影下有架火車駛入站，我哋當然係唔好執輸去影哈啦....影完就係個火車站到買咗Ｄ雪條食，味道都唔錯呀 !! 

睇完呢個我哋就去梧棲漁港到食 Lunch，途中經過一個唔知咩地方，我哋又落車影下相 !! 去到梧棲漁港都成點半鐘，當然係要搵咗嘢食先啦 !! 我哋就行咗入去食嘢嘅地方，個Ｄ人好似Ｄ蜜蜂見到蜜糖咁係咁行埋來，最後我哋都揀咗一間，叫咗幾個餸食，味道叫做可以啦。

途經呢一個唔知咩地方，見幾靚就影下相....

梧棲漁港

呢條街都幾多嘢食買

美食區 - 入面Ｄ食店好似香港Ｄ大排檔咁架

是日午餐

繼續掃街

入面真係有個漁市場架

Ｄ魷魚好大條呀...

梧棲漁港，有遊覽船可以載出去睇下個漁港，當然要收錢啦

食完我哋就出去出面掃下街，個條街仔都有唔少嘅嘢食架 !! 係呢到買咗Ｄ食嘢，之後就去下一個景點，就係東勢林場喇，去東勢林場做咩呢 ?? 就係去睇螢火蟲囉，呢一段時間就係睇螢火蟲嘅高峰期當然係唔可以錯過啦 !!

去呢個東勢林場嘅路程都幾遠下，原來呢一段路我哋第一日就行過架啦，我哋到咗東勢林場嘅時候係入場個到有個人無神神問埋Ｄ香港一國兩制好唔好Ｄ嘢，真係奇怪 !! 入到去個停車場，一Ｄ都唔見有人咁，不過當時都係大約五點半到，我哋以為係未到時間，於是就係入面周圍兜，兜到條路嘅盡頭，我哋就停係到睇日落，不過今日大霧得濟，好勁煙霞睇唔到日落。之後就搵個有利位置去睇螢火蟲喇，個天啱啱黑嘅時間無咩嘢睇到，到開始入黑晒嘅時候就睇到越來越多嘅螢火蟲周圍飛，係最多嘅時間多到好似聖誕燈飾咁，真係好靚~~~外母開頭都唔想行，後來大家一齊陪佢行先得，如果唔行真係好晒呢 !! 因為真係好靚 !! 不過就影唔到Ｄ相啦，因為Ｄ機係黑暗嘅環境對唔對焦唔到，反而Ｄ Prosumer 機影到喎，正 !! 期間呢個東勢林場攪咗Ｄ導覽 團，不過就好大聲囉，完全同外國睇螢火蟲嘅感覺唔同，外國好保護呢Ｄ野生動物，但係台灣又唔多似係.....可能每個地方對保護野生動物嘅方法唔同呱 !!

睇到少少日落架...

螢火蟲...係現場重要多好多

睇完呢個螢火蟲，我哋就要去食 Dinner ，之前係網上面無意中搵到一間叫烤狀猿日式燒烤，呢一間都幾近我哋 Motel ，同埋價錢真係幾抵，唔洗HK$100就可以碳燒同火銅任飲任食，其實之前重有一間幾出名架，就係鼎王麻辣鍋，不過驚Ｄ團友頂唔 緊，所以就無揀呢一間啦。去搵呢一間個 GPS 又係入唔到個地址，唯有就係入附近嘅地方，然後就人肉 GPS 喇，去到都搵咗一陣先搵到。我哋九點三到到咗，原來九點半後個價錢又平Ｄ，個幾個字當然係要等下啦 !! 總體來講都幾好味，三哥重叫咗Ｄ魚生，但係就唔係好得，都係碳燒同火銅得Ｄ。食完嘢，我哋重要去Motel附近嘅7仔到攞埋之前訂咗嘅牛爾用品，攪掂返到 Motel都成十一點幾喇....咋咋淋沖涼瞓覺啦...今日嘅行程都幾豐富喎 !!

是日晚餐....碳燒加火鍋