新城勁爆流行榜

林奕匡最近被邀請登上The First Take（TFT）頻道，除了演繹了〈高山低谷〉10周年版本外，他亦特別與兩位師妹兼好友黃妍及葉巧琳一齊走進TFT的錄音室，演繹了由他與Anson Chan作曲、黃偉文填詞的新歌〈藝術 與 科學〉。

過去從未有海外歌手會在TFT獻唱全新作品， Phil見機會難得，就想到要寫一首好玩的作品，並找來Cath與Mischa首度合作，不過三個人音域不一，Phil於是揀了一首原本為Solo的Demo，再調校音調 (Key)，令到三個人都適合去唱。

至於歌曲的主題，作詞的Wyman則以男女不同角度，道出雙方截然不同的愛情觀：男生不但理性，有時更會用科學角度去計算愛情；女生感性看愛情，甚或覺得愛情根本就是一門藝術。想法迴異，看似難以溝通，但其實經過磨合之後，愛情還是會萌芽、開花、結果。Wyman在創作歌詞時，特別用上帶知識性、測試性的用字去描述男生對愛情的想法，科學得來十分理性；他又以帶情感的用字來形容女生對愛情的感性，用字優美得根本是一次藝術文創。

Phil、Cath和Mischa首度合作就要挑戰TFT的一Take過錄音，而這個錄音亦是正式上架版本，所以在錄音前，三個人經過無數的練習，Mischa透露練習過程道：「我同Cath一齊唱嘅部份需要大家一齊去決定一啲Phrasing ，邊個長邊個短D 或者要斷開，大家都係一齊決定出嚟，和音部分要配合返主音，因為係一首輕鬆嘅歌，所以用輕鬆方式去唱，感覺似兩女一男打情罵俏。」Cath亦透露灌錄前眾人的準備過程，說：「同平日錄音好唔同，平日會喺錄音室試好多唔同Version，今次TFT嗰一Take，就係正式灌錄嘅第一Take，所以喺香港，甚至去到日本，我哋都Book咗Studio去唱去夾，要做到有默契，好精準。夾咗默契之後，就好Smooth，因為本身Friend底，真正唱緊時就好似玩一樣。」

不過三位唱歌向來都很有個人風格，今次合作，反而突出了各人的歌唱特色，Phil道：「我哋用自己最Natural嘅Approach去唱，透過唱歌去凸顯自己個性，好似Cath柔情啲，Mischa相對就比較爽朗，我就以男性角度表達歌曲內容。」Cath亦補充道：「因為準備時間唔算長，我哋都係用本能多過用新方法，同埋練習時Edward Chan一直喺度，我哋試唔同嘅聲去唱時，Edward聽到覺得得意，都會建議我哋錄音時可以用某種唱法。同埋因為同步錄音，聽到對方唱啲乜嘢，就會有React，加上超級多嘅練習，我哋三個把聲就好容易Blend埋一齊，Yeah!」