【都市健教科】（逢星期三9am後播出）
主理：（相片由左至右）鄭芷彤、黃鉦貽Meagan中醫師、林柏希
29/7 主題： 濕疹
【成因】
濕疹發作係因為先天條件、後天失養，加上飲食不節而傷左個脾胃，令到脾虛，加上同風濕熱邪相搏，造成風濕熱浸淫肌膚為特徵嘅急性濕疹，慢慢形成左脾虛同血虛為特徵嘅濕疹。
【分類】
1. 急性濕疹位置：可發喺身體任何部位，亦可泛發全身，但最常發喺頭臉、耳後面、手腳，多數係對稱嘅。皮膚會出啲較紅嘅皮疹，多呈對稱分佈，皮疹通常係片狀或彌漫性，非常痕癢，抓破後會流滋，粘粘地，糜爛同結痂。病程：如果唔轉化為慢性濕疹，大概需要1-2個月就會好返。加重：自覺痕癢劇烈，抓癢、肥皂熱水燙洗、飲酒、食辛辣發嘅食物都會令到皮疹加重，瘙癢加劇，嚴重會影響睡眠。
2. 亞急性濕疹通常係急性濕疹未能及時治療，或處理唔好，拖長左個唔舒服。亦可以係岩岩發即刻呈亞急性濕疹。皮疹較急性濕疹輕，以丘疹、結痂、甩皮為主，僅有少量水疱同輕度糜爛。不過都會自覺瘙癢劇烈，特別夜晚嚴重。
3. 慢性濕疹通常係由於急性同亞急性濕疹處理唔好、長期未好返、或反覆發作而成。都有部分朋友一開始就表現為慢性濕疹。皮疹多局限於某一部位，例如小腿、手腳、手摺位、膝摺位。皮膚肥厚粗糙，掂落去較硬，色暗紅或紫褐，皮紋顯著或似苔蘚樣。皮膚瘙癢，尤其夜晚會嚴重啲，甚至會痕醒，抓到損晒會有少量流滋。位置：多數發生喺手腳關節嘅朋友，常易出皸裂，覺疼痛，影響活動。加重：夜晚、精神緊張、飲酒、食辛辣發嘅食物，會令瘙癢更甚。病程：病程較長，反復發作，時輕時重。
有d小朋友喺頭臉/手摺位/膝蓋、膝後摺位/腳踝會出紅斑或丘疹，嚴重會出水疱，糜爛成片，而且愈黎愈大片，會痕癢劇烈，反覆發作，皮膚粗糙，尼種我地稱為「四彎風」，會影響到日常生活，例如：上堂唔專心，夜晚又瞓得唔好，個人會好煩躁不安，有機會有鼻敏感、氣喘尼d問題，因為「肺與皮毛相表里」。
【湯水】
1. 發病快，皮膚抓損，有丘疹，會覺得灼熱瘙癢停唔到，抓損滲液流脂水，粘粘地個人覺得心煩，成日想飲水，大便乾材料：赤小豆10g 魚腥草15g 地膚子15g 淮山 + 瘦肉1-2人份量
2. 發病較緩慢，有丘疹，瘙癢，抓後糜爛滲出，有鱗屑，胃口一般，腹脹材料：云苓10g 白術10g 淮山 陳皮 地膚子6g + 豬𦟌1-2人份量作用：健脾利濕止癢
【穴位】
1. 風池穴：雙手掌心貼喺耳朵，十指自然張開抱頭，拇指往上推，喺頸同髮際嘅交接綫各有一凹处（即：風池穴位於頸，當枕骨之下，與風府穴相平，胸鎖乳突肌與斜方肌上端之間的凹陷處。）
頸肩部有濕疹，可推揉風池穴
2. 曲池穴位置：曲肘成90度，肘横紋外端凹陷中。尋找方法：曲池穴位于肘部，尋找穴位時曲肘，横紋盡處，即肱骨外上髁内缘凹陷处。上臂外側有濕疹，可以推揉推揉
【外用】
可以去買香茅煲黎沖涼，可加金銀花。
【預防】
1. 忌用熱水湯洗，忌用肥皂洗患處
2. 應避免搔抓，以防感染
3.忌食辛辣、無鱗魚、羊、牛、蝦、蟹、鵝、鴨，忌食香草、韮菜、芹菜、姜、葱、蒜。
4. 忌食奇異果、榴連、芒果、提子、橙、黑白胡椒、咖哩、沙嗲、辣椒、七味粉、菇類、酒、朱古力、太甜嘅食物
5. 避免著羊毛或者尼龍衫，盡量用全棉質地，沖涼嘅時候盡量喺15分鐘完成
6. 避免用太熱嘅水沖涼，要塗潤膚劑，減輕皮膚乾燥，避免用含有香料嘅沖涼液
7. 少做劇烈運動/曬太陽，出汗之後會更加痕
以上提及的湯水及穴位按摩只有舒緩之用，效果亦因應個人體質而定，要根治問題就要看醫生醫師了！