|
盧冠廷╳林家謙《列車上對著坐的兩個人》
兩代音樂人合唱交織新舊火花
LoLo傳授「心法」帶林家謙突破自我：
要唱得好最重要係「唔好諗」
列車上對著坐的兩個人——盧冠廷、林家謙。
盧冠廷（LoLo）創作步伐從未止息，繼去年與麥浚龍推出《旋律．故事》後，再次聯乘年輕音樂人推出跨時代新作——《列車上對著坐的兩個人》。
盧冠廷與林家謙同為唱作人，聲線辦識度高，而且創作才華備受肯定，今次新作將二人共通點發揮得淋漓盡致，歌詞及編曲意境充滿電影感，單憑歌名已能為聽眾提供想像空間，處於同一個車廂內的音樂人懷著不同的心態展開一段音樂之旅。
列車上對著坐的兩個人，寓意兩位音樂人順著時間推移繼續邁步，窗外風景一樣，可是心態卻不同。盧冠廷作為前輩，將人生歷練化作動人旋律，筆下寫過首首膾炙人口的金曲；同時未有因而自滿，反之不懈鑽研，探究音樂無邊的可能性。林家謙作為後起之秀，在樂壇嶄露頭角，將前人的音樂養份化作己用，再注入新思維，開闢未來的前路。
盧冠廷與林家謙合作，曾經討論過要寫一首如《The Sound of Silence》般厲害的作品，LoLo笑言：「我要逼呢位小朋友超越自己嘅作曲水平！」及後再與監製葉廣權商討後，LoLo便寫了今次的作品《列車上對著坐的兩個人》。林家謙表示花了很多時間消化歌曲，他說：「今次合作都頗大壓力，因為LoLo係一位好好嘅前輩，同埋音樂造詣好犀利。喺創作過程同諗點樣唱都消化咗好耐，我會諗係咪要學LoLo嘅唱法，但同時又要保留自己特色，喺呢一點取得一個平衡，其實一路都懷疑自己夾唔夾隻歌。」對於「懷疑自己」，LoLo如此回應：「呢位小朋友經常都懷疑自己做得啱唔啱，呢個雖然係一個缺憾，但係一個缺憾美，有佢嘅好處。因為要明白到，冇可能令全世界都鍾意你。你嘅作品有一部份人好鍾意已經足夠，如果要迎合所有人口味就會失去自我。我咁多年創作都係信自己，因為冇可能聽所有人嘅意見，唔係每一個都係你嘅producer嘛。」
LoLo還傳授了音樂「心法」給家謙，就是要「不去想」，他說：「諗與唔諗呢個問題，家謙仲比較後生，都係用意識去諗去創作，如果可以接通天地線就會有可以打入人心嘅作品。同樣地唱歌都一樣，如果太在意去諗每粒音要點唱，設計出嚟嘅音色始於係設計，再甚者就係堆砌，要感動最簡單同時又係最難嘅，就係自然地由心而發。」家謙表示同意，但覺得需要時間去消化領略。
|